Heimatabe 2023

Bärgbure-Früd u Bärgbure-Sorge: Üses Volksstück het e Ihblick gä i d’Höch u d’Tüüf vomene hütige Bärgbureläbe. Das Ganze isch mit schöne Tänz, aute u bekannte u nöi inszenierte Lieder umrahmt worde. Das aues isch vom 12. - 19. November 2023 z’Schüpbach im Chrüz z’gseh u z’lose gsy.

Sommer - Programm 2023

Mir hei das Jahr wieder d Bundesfir am 31. Juli vo Singnou dörfe dürefüehre. Feins vom Grill, gueti Kaffi u Süesses - für ds libleche Wouh hei mir gsorgt.

Einisch im Jahr mache o mir e Usflug. Das mau si mir bi bestem Wätter uf d Bannalp u hei e schöne Tag zämme gnosse. Wandere, ploudere, zämme ässe u treiche oder de ono eis singe - das gfaut üs!

77 Jahre
TG Schüpbach

Jubiläum 2023

Am Wucheänd vom 14. u 15. Apriu 2023 hei mir gmeinsam uf di 77 Jahr Trachtegruppe Schüpbach ahgstosse, gsfeschtet u gfyret. Dr Jodlerklub Schüpbach, d’ Örgelifäger, d’ Edelwyss Stärnen, z’ Echo vom Chuderhüsi u d’ Regula, Miriam u d’ Flurina Bolliger hei üs es wunderbars Programm bescheert.

Merci viu mau a aui Bsuecherinne u Bsuecher - schön sit dir derby gsi!

Heimatabe 2022

Vom 12. - 20. Novämber 2022 hei mir a üsem Heimatabe d’Zueschourinne u d’Zueschouer i d Wäut vom “Hudilumper-Grytli” entfühert. Derzue heimer übere Morgegruess oder Lenas Aigäglanz gsunge u vom Walzer bis zum Schottisch tanzet.

Schön ischs gsi u guet hets tah, nach dere Zwangspouse ume e Heimatabe dürezfüehre.

Volkstümliche Abe uf der Marbachegg

Mir hei am 23. Juli 2022 ä wunderschöne Abe uf der Marbachegg dörfe verbringe. Es het guet tah - ume eis ä Uftritt, zämme tanze, zämme singe u lustig ha.

Es grosses MERCI a aui Beteiligte!